Аб’ёмы вытворчасці жывёлагадоўчай прадукцыі непасрэдна залежаць ад якасці кармоў, што ў сваю чаргу забяспечваецца сучаснымі тэхналогіямі. У іх ліку і ўпакоўка кармоў у спецыяльную палімерную плёнку, закладка ў бетонныя траншэі.

Умяшчальнасць аднаго кармасховішча складае ў сярэднім больш за дзве тысячы тон сенажу. Для якаснага захавання травяністых кармоў траншэю запаўняюць на працягу трох дзён. З пачатку корманарыхтоўкі ў філіяле запоўнена ўжо трэць траншэй.

Паралельна з закладкай сенажу ў траншэі вядзецца яго нарыхтоўка ў стрэйч-плёнку. З дапамогай прэс-падборшчыка «Ф’южн» упакавана ў рулоны больш за 310 тон якаснага корму. Усяго такім спосабам плануецца нарыхтаваць больш за 1500 тон сенажу.

Корманарыхтоўка — адзін з найбольш важных і адказных працэсаў сельскай гаспадаркі. Таму адпаведную работу выконваюць вопытныя спецыялісты.
На касілках працуюць Сяргей Касьянаў, Алег Даўбенка, Міхаіл Пякарскі, Іван Чарнецкі. Падсушвае траву варушылкай Уладзімір Даўбенка. Умела працуюць граблямі Валерый Стрыга і Васілій Мажуць. Падбіраюць траву з валкоў механізатары Аляксандр Брылеўскі, Міхаіл Тамашэвіч, Андрэй Касцюкевіч і Аляксандр Валынец. Звыш дзясятка аўтамабіляў МАЗ і трактароў «Беларус» з прычэпамі дастаўляюць зялёную масу для закладкі ў траншэі.

Вельмі адказная работа і на трамбаванні травяной масы. Выконваюць яе Аляксей Лапко, Уладзімір Зяновіч і Валерый Пахадня.

Для аператыўнага кіравання рабочым працэсам усе работнікі механізаванага корманарыхтоўчага звяна забяспечаны сродкамі мабільнай сувязі. Гэта зроблена ў тым ліку для таго, каб зялёны канвеер у гаспадарцы працаваў без збояў.

Інфармацыя з афіцыйнага сайта РУП «МІНСКЭНЕРГА».