Прадукцыя радашковіцкіх вытворцаў касметыкі праславіла гарадскі пасёлак далёка за межамі нашай краіны. Яна пастаўляецца ў Расію, Украіну, Казахстан, Літву, Малдову, Латвію, Эстонію… Яе прыхільнікі ёсць і на Блізкім Усходзе.
Прадпрыемства аснашчана сучасным абсталяваннем, тут выкарыстоўваюцца перадавыя тэхналогіі, дзейнічае пастаянны кантроль якасці. Аднак галоўны фактар поспеху — згуртаваны калектыў, дзе працуюць сапраўдныя прафесіяналы. Дзякуючы іх ведам і майстэрству тысячы людзей становяцца больш прыгожымі і ўпэўненымі ў сабе.
Яўгенія МАРКОЎСКАЯ, аператар расфасовачна-ўпаковачнага аўтамата:
— На прадпрыемстве працую шэсць гадоў. Работа падабаецца. Псіхалагічны клімат у калектыве добры. Гэта ў многім дапамагае выпускаць прадукцыю, якая падабаецца і жанчынам, і мужчынам. Рада, што маю дачыненне да стварэння прывабнага вобраза нашых спажыўцоў.
Людміла ПАЎЛОЎСКАЯ, апаратчык прыгатавання парфумерна-касметычных сродкаў:
— На «Белор-Дызайне» працую восем гадоў. Жыву ў Радашковічах. На змену заўсёды прыходжу з добрым настроем. Касметыку ствараю па строга вызначанай рэцэптуры. Работа цікавая, прыносіць сапраўднае задавальненне.