20.05.2020 11:45

Аграном Іна Шчарбакова: «Усе працуем у адной звязцы»

Іна Шчарбакова — лепшы работнік сельскай гаспадаркі Маладзечаншчыны па выніках работы за мінулы год.

Аграном Іна Шчарбакова. Аграном Іна Шчарбакова. "Маладзечанская газета".

Яе імя занесена на раённую Дошку гонару.

Прафесія агранома складаная нават для мужчын. Аднак некаторыя прадстаўніцы прыгожай паловы чалавецтва з сельскагаспадарчымі справамі спраўляюцца не горш. Вось і спецыяліст ААТ «Гарадзілава» Іна Шчарбакова выдатна выконвае свае абавязкі, умее знайсці агульную мову з іншымі работнікамі. У гэтым і заключаецца сакрэт яе поспеху. А яшчэ ў працавітасці і грунтоўнасці, якімі адрозніваецца большасць вяскоўцаў.

Нарадзілася Іна Міхайлаўна ў вёсцы Падбярэзь Валожынскага раёна. Пасля школы закончыла Гродзенскі сельскагаспадарчы інстытут (цяпер – аграрны ўніверсітэт). Атрымала дыплом вучонага-агранома. Працавала аграномам-аграхімікам, галоўным аграномам на Валожыншчыне. У наш раён разам з сям’ёй пераехала ў 2016 годзе.

У калектыў ААТ «Гарадзілава» ўлілася адразу. І менавіта ў гэтай гаспадарцы ў поўнай меры раскрыліся ўсе яе прафесійныя здольнасці. Паўплывалі немалы ўжо вопыт, а таксама пад-трымка з боку кіраўніка таварыства Дзмітрыя Грамовіча.

— У гаспадарцы ў наяўнасці практычна ўсе фактары, якія спрыяюць поспеху, — гаворыць Іна Шчарбакова. — Глеба ў асноўным сугліністая, урадлівая. Яна добра затрымлівае вільгаць, таму засуха не вельмі страшная. Гэта спрыяльна адбіваецца на росце і развіцці сельскагаспадарчых культур.

Аднак спадзявацца толькі на прыроду не варта. Галоўным чынам высокая ўраджайнасць дасягаецца за кошт усяго комплексу агратэхнічных мерапрыемстваў, сярод якіх — падкормка раслін, унясенне ўгнаенняў, аптымальны севазварот. Фінансаванне адбываецца своечасова і ў поўнай меры. Насенны матэрыял закупляецца якасны. Пастаянна папаўняецца матэрыяльная база гаспадаркі. Важнае значэнне мае высокая культура вытворчасці.

— Праблем з арганізацыяй работ не ўзнікае, — працягвае Іна Міхайлаўна. – Працаваць з механізатарамі — адно задавальненне. Хлебаробы матываваныя. Яны атрымліваюць высокую заработную плату. Пасля заканчэння жніва ёсць яшчэ прыемныя бонусы ў выглядзе каштоўных падарункаў. У гаспадарцы кожны год многа «тысячнікаў». Увогуле, прыемна, што мужчыны мяне паважаюць. З гатоўнасцю выконваюць усе даручэнні. А як інакш? Усе працуем у адной звязцы.

Субяседніца адзначыла, што вялікія плошчы ў «Гарадзілаве» адводзяцца пад азімыя рапс і пшаніцу. Стаўка на гэтыя культуры апраўданая. Так, летась ураджайнасць рапсу склала 42,6 цэнтнера з гектара, прыбытак ад яго – 618 тысяч рублёў, пшаніцы – 64,4 цэнтнера з гектара (прыбытак – 771 тысяча рублёў). Увогуле, па ўраджайнасці рапсу, збожжавых і зернебабовых «гарадзілаўцы» адны з лідараў у вобласці.

Паколькі гаспадарка спецыялізуецца на жывёлагадоўлі, значныя плошчы займае люцэрна. Прычым пасевы гэтай кармавой культуры рэгулярна абнаўляюцца. Добра родзіць на палетках і кукуруза. У выніку статак надзейна забяспечваецца кармамі.

— Віды на ўраджай сёлета добрыя. Азімыя выдатна перанеслі халодны перыяд. Яравыя пасеялі хутка і ў найбольш спрыяльныя агранамічныя тэрміны. Свое-часова закрылі вільгаць на палях. Цяпер заканчваем падрыхтоўку да корманарыхтоўкі. Арганізавана пройдуць і наступныя этапы палявых работ, — падзялілася думкамі Іна Шчарбакова.

У канцы размовы Іна Міхайлаўна прызналася, што для яе ганарова працаваць у «Гарадзі-лаве». Спецыяліст раслінаводчай галіны добра вывучыла і землі гаспадаркі, і характары работнікаў. На работу прыходзіць з пазітыўным настроем і перадае яго іншым.

Тэкст і фота: Алег БЯГАНСКІ.

Прочитано 1296 раз
Алег Бяганскі

Этот адрес электронной почты защищён от спам-ботов. У вас должен быть включен JavaScript для просмотра.

Добавить комментарий


Защитный код
Обновить