04.04.2020 13:19

Во время каникул на Молодечненщине работают 20 школьных лагерей

20 школьных аздараўленчых лагераў дзённага знаходжання працавалі ў нашым раёне ў час школьных вясенніх канікулаў.

Во время каникул на Молодечненщине работают 20 школьных лагерей. Во время каникул на Молодечненщине работают 20 школьных лагерей.

Па інфармацыі Антаніны Рынкевіч, вядучага спецыяліста прадстаўніцтва Мінскага абласнога ўпраўлення Рэспубліканскага цэнтра па аздараўленні і санаторна-курортным лячэнні насельніцтва па Маладзечанскім раёне, шасцідзённыя лагеры былі створаны з 30 сакавіка па 4 красавіка ў 14 гарадскіх установах адукацыі і 6 сельскіх (Красненская, Лебедзеўская, Палачанская, Радашковіцкая, Чысцінская, Турэц-Баярская сярэднія школы). У іх з карысцю праводзілі час 935 дзяцей. На гэтыя мэты дзяржавай выдаткавана больш за 23,5 тысячы рублёў. Сярэдні кошт пуцёўкі на аднаго вучня – 27,12 рубля. Бацькоўская даплата зусім нязначная: для вучняў 14-15 гадоў – 3 рублі 90 капеек, 11-13 гадоў – 1 рубель 86 капеек, ад 6 да 10 гадоў — даплата не патрабавалася.

У навучальных установах былі скарэкціраваны планы культурна-выхаваўчых мерапрыемстваў. Калі раней дзеці разам з педагогамі наведвалі басейны, кінатэатр, музей, іншыя ўстановы, то цяпер уся праграма праходзіла толькі ў межах школ і гімназій. Праводзіліся мерапрыемствы грамадзянска-патрыятычнай тэматыкі, прысвечаныя 75-годдзю Вялікай Перамогі, пазнавальныя віктарыны і квэсты, майстар-класы, музычныя конкурсы. Шмат увагі надавалася спартыўным мерапрыемствам, гульням на свежым паветры на школьнай тэрыторыі. За здароўем дзяцей і захаваннем імі гігіены пільна сачылі медыкі і настаўнікі. З вучнямі праводзіліся растлумачальныя гутаркі. Памяшканні, дзе бавілі час выхаванцы, мылі з прымяненнем дэзінфіцыруючых сродкаў.

Шмат гадоў з’яўляецца начальнікам аздараўленчага лагера «Отдыхай-КА» Красненскай сярэдняй школы Ларыса Карчміт, намеснік дырэктара па выхаваўчай рабоце.

— Як у вас арганізавана работа лагера з улікам эпідэміялагічнай сітуацыі? – спыталіся мы ў Ларысы Іванаўны.

— У нашым лагеры 26 дзяцей, якіх мы разбілі на два атрады: пачаткоўцаў і вучняў 5-7 класаў. Мы іх развялі па класах у розных канцах калідора, каб яны не кантактавалі. Усе мерапрыемствы – толькі ў сценах школы і на яе тэрыторыі: нікуды не выходзім, нікога чужога не запрашаем, — расказвае начальнік лагера. – Кожную раніцу медсястра мясцовай амбулаторыі мерае ў дзяцей тэмпературу, аглядае іх, пытаецца пра самаадчуванне. Усе дзеці ў лагеры здаровыя.

Для выхаванцаў была распрацавана цікавая праграма, кожны дзень распланаваны літаральна па хвілінах. Акрамя педагогаў, якія працавалі ў лагеры выхавальнікамі, з дзецьмі займаліся школьны псіхолаг, педагог сацыяльны, педагог-арганізатар. Хлопчыкі і дзяўчынкі з задавальненнем наведвалі майстар-класы: на адным з іх рыхтавалі велікодныя падарункі. Не абыходзілася і без заняткаў у камп’ютарным класе. Абавязковыя гульні на свежым паветры, спартыўныя спаборніцтвы.

Цікавыя мерапрыемствы праводзілі і вучні 10 і 11 педагагічных класаў, якія два гады факультатыўна вывучаюць «Увядзенне ў педагагічную прафесію». Для іх гэта першыя педагагічныя спробы, зазначае Ларыса Іванаўна. Старшакласнікі актыўна выкарыстоўвалі розныя інтэрактыўныя формы: праводзілі квэст-гульні, інтэлектуальныя віктарыны.

Цікавы сумесны анлайн-праект, які дзейнічае ў час школьных канікулаў з 30 сакавіка па 6 красавіка, распрацавалі Беларускі рэспубліканскі саюз моладзі і Беларуская рэспубліканская піянерская арганізацыя. Яго ўдзельнікі атрымлівалі карысныя і цікавыя заданні: зрабіць уборку ў сваім пакоі, пасадзіць кветку, прыгатаваць сняданак ці выбраць фільм для ўсёй сям’і. Пасля выканання заданняў школьнікі павінны былі зрабіць сэлфі ці фота аб выніках іх работы і размясціць на сваіх старонках у сацыяльных сетках з хэштэгам #клёвыеканикулы. Той, хто выканаў усе заданні, можа прэтэндаваць на падарункі ад БРСМ і БРПА.

Анжаліка КРУПЯНЬКОВА.
Фота: архіў КРАСНЕНСКАЙ СШ.

 

Прочитано 237 раз Последнее изменение 04.04.2020 13:19
Анжаліка Крупянькова

Этот адрес электронной почты защищён от спам-ботов. У вас должен быть включен JavaScript для просмотра.

Добавить комментарий


Защитный код
Обновить